دەم پارتی: ئۆجه‌لان داوای كردوه‌ له‌گه‌ڵ مه‌سعود بارزانی، نێچیرڤان بارزانی، مەزڵوم كۆبانێ، قوباد تاڵه‌بانی و بافڵ تاڵەبانی کۆببێتەوە".

23:44 2025-06-11 54367 كوردستان 0

2025-06-11

54367

ئایشەگول دۆغان، وتەبێژی دەم پارتی ڕایگه‌یاند، بەنیازن بە زوترین کات سەردانی دورگەی ئیمڕاڵی بکەن و ئەگەری زۆرە ئۆجه‌لان لەگەڵ نوێنەرانی لایەنە سیاسییە جیاوازەکانیش کۆببێتەوە، ده‌شڵێت، "ئۆجه‌لان داوای كردوه‌ له‌گه‌ڵ مه‌سعود بارزانی، نێچیرڤان بارزانی، مەزڵوم كۆبانێ، قوباد تاڵه‌بانی و بافڵ تاڵەبانی کۆببێتەوە".

ئایشەگول دۆغان ئه‌مڕۆ چوارشه‌ممه‌ له‌میانی كۆنگره‌یه‌كی ڕۆژنامه‌وانیدا ڕایگه‌یاند، "پرسی کورد تەنها پرسی کورد نییە و ئەوەی ئێمە ئەزمونمان کردوە بەڵگەیە لەسەر ئەمە، بۆیە کاتێک چارەسەری دیموکراسی و ئاشتی وەک پێویستیەکی سیاسی و کۆمەڵایەتی و مرۆیی سەیر دەکرێت، کاتێک بەم شێوەیە نزیک دەبێتەوە، پەرلەمان دەتوانێت زۆر بە خێرایی دەستپێشخەری بکات، وەک ده‌م پارتی ئامادەکاریمان هەیە سەبارەت بە ڕێکار و جەوهەر و چۆنیەتی دروستكردنی ئه‌نجومه‌نێك و ئێمە ڕەشنوس و پێشنیارێکی لەو شێوەیەمان هەیە".
ئاماژه‌ی به‌وه‌شكرد، "ئامادەکاری دەکەین بۆ ئەوەی بچینە دورگەی ئیمڕاڵی، بەنیازین بە زوترین کات سەردانی دورگەی ئیمڕاڵی بکەین، لەگەڵ شاندێک کە پێکهاتوە لە ئەندامانی میکەکەمان، لەنێویاندا هاوسەرۆکەکانمان، ئامادەکاری دەکەین بۆ ئەوەی ڕاستەوخۆ لەگەڵیدا کۆببینەوە و ڕاوێژ بکەین بەمەبەستی تێگەیشتن و ڕونکردنەوەی ئەم ماوەیە و ڕێکخستنی بەهێزتر، ئێمە دەیکەین".
وته‌بێژی ده‌م پارتی وتیشی، "ئەگەری زۆرە لە ڕۆژانی داهاتودا ئۆجەلان لەگەڵ نوێنەرانی لایەنە سیاسییە جیاوازەکان کۆببێتەوە، دەیەوێت لەگەڵ نوێنەرانی پارتی دیموکراتی کوردستان و یەکێتی کۆببێتەوە".
ئه‌وه‌شی وت، "بە لەبەرچاوگرتنی مەودا و قورسایی کێشەکە؛ پێمان وایە بە قازانجی دەبێت لەگەڵ مەسعود بارزانی، نێچیرڤان بارزانی، مەزڵوم كۆبانێ، قوباد تاڵه‌بانی و بافڵ تاڵەبانی کۆببێتەوە، هەروەها دەزانین کە ئەو دەیەوێت ئەو کۆبونەوانە ئەنجام بدات، پێمان خۆشە ئەمە لەگەڵ ڕای گشتیدا بەشی بکەین، ئەمە داواکارییەکەی به‌ڕێز ئۆجەلانه‌ و پێمان وایە بۆ ئەو زۆر بەنرخە کە لەگەڵ سەرکردەکانی پارتە سیاسییە جیاوازەکان و کەسایەتییە گرنگەکان کۆببێتەوە".