دەستەی مافی مرۆڤی هەرێم سەرکۆنەی "هەڵکوتانە" سەر ماڵێک لە سلێمانی دەکات

23:14 2024-01-10 31465 كوردستان 0

2024-01-10

31465

دەستەی سەربەخۆی مافی مرۆڤی کوردستان رایگەیاند، رۆژی سێشەممە هێزێکی ئەمنی نەناسراو هەڵیان کوتاوەتە سەر ماڵێک و چەند کەلوپەلێکیان بردوە، لەسەر ئەو دۆسیەیە پەیوەندییان بە ئاسایشی سلێمانییەوە کردوە بەڵام وەڵامیان نەدراوەتەوە، بۆیە سەرکۆنەی ئەو حاڵەتە دەکەن، چونکە پێچەوانەی یاسایە و هیچ پاساوێک بۆ هەڵکوتانە سەر ماڵی خەڵک بەبێ بڕیاری دادگا بونی نییە.

دەستەی سەربەخۆی مافی مرۆڤ لە راگەیەنراوێکدا بڵاویکردەوە، ڕۆژی سێشەممە هێزێکی چەکداری ناسنامە نادیار هەڵدەکوتنە سەر ماڵێک لە شاری سلێمانی، بەوتەی یەکێک لەخاوەن ماڵەکە هێزێکی نادیار بونەو خۆیان نەناساندوە و هیچ فەرمانێکی دادگاشیان پێ نەبوە چونەتە سەر ماڵەکەیان و پشکنینان کردوە و چەند کەل وپەلێکی ماڵەکەیان بردوە.
ئاماژە بەوەشکراوە، دەستەی مافی مرۆڤ وەک ئەرکی خۆی لە چاودێری وبەدواداچون بۆ پێشێلکاریەکان له ڕۆژی چوارشەممەوە لەڕێگەی نوسینگەی سلێمانی مافی مرۆڤەوە بەدوا داچونی کرد بۆ حاڵەتەکە بۆ ئەو مەبەستەش لای خۆیانەوە پەیوەندیان بە ئاسایشی سلێمانی کردوە بۆ وەرگرتنی زانیاری بەڵام پەیوەندیەکانیان وەڵام نەدراوەتەوە و تا ئێستاش هیچ دەزگایەکی ئەمنی و ئیداری پارێزگای سلێمانی هیچ ڕونکردنەوەیەکیان نەداوە لەسەر ڕوداوەکەو ناسنامەی ئەو هێزە چەکدارە کە بەوتەی خاوەن ماڵەکە دەیان کەس بونە.
ئەوەشخراوەتەڕو، وێڕای ئەوەی ئیدانەی ئەو حاڵەتە دەکەن و تەواو پێچەوانەی ڕێکارە یاساییەکانە و دژی بنەماکانی مافی مرۆڤەو هیچ پاساوێک نیە بۆ هیچ دەزگایەکی ئەمنی و سەربازی بۆ هەڵکوتانە سەر هیچ ماڵ و کەسێک بەبێ فەرمانی دادوەرو لەدەرەوەی یاسا.
لە راگەیەنراوی دەستەی مافی مرۆڤ باس لەوەشکراوە، نیگەرانین لە بێ دەنگی و بڵاونەکردنەوەی زانیاری لەلایەن دەزگا فەرمیەکانی حکومەتی خۆجێی لە سلێمانی لەسەر ڕوداوەکە چونکە پاراستنی گیان و ماڵی خەڵک لەئەستۆی ئەو هێزانەیە ناکرێ هێزێکی چەکدار لەدەرەوەی یاساو ڕێکارەکان و بێ دیاری کردنی ناسنامەیان و بێ ئاگاداری لایەنە فەڕمیەکان هەڵبکوتنە سەر خەڵک .