دوای مانگێک لەدەستگیرکردنی رۆژنامەنووس بەشدار بازیانی لە سلێمانی ئازادکرا

17:33 2025-03-27 56018 كوردستان 0

2025-03-27

56018

رۆژنامەنووس بەشدار بازیانی لە سلێمانی ئازادکرا دوای نزیکەی مانگێک لە دەستگیرکردنی.
بنەماڵەی ڕۆژنامەنووس بەشدار بازیانی لە ئاگاداری بۆ ڕای گشتی پێشتر ڕایانگەیاندووە، بە ناوی خێزانی ڕۆژنامەنووس (بەشدار بازیانی)، کە بەشدار بازیانی لە ڕۆژی هەینیەوە 28ـی شوباتی 2025، لەلایەن هێزەکانی یەکێتیی و ئاسایشەوە دەستگیرکراوە.
بنەماڵەی ڕۆژنامەنووس بەشدار بازیانی دەڵێن: داواکارین لەلایەنە پەیوەندیدارەکان بەزووترین کات (بەشدار) ئازاد بکەن و ڕێز لە یاسا و مافەکانی مرۆڤ بگرن، هەروەها داوا لە هەموو خەڵکی بەشەرەف، ڕێکخراوەکانی مافی مرۆڤ، سەندیکای ڕۆژنامەنووسان و میدیاکاران دەکەین کە پشتگیریمان بن بۆ ئازادکردنی.

باس لەوە دەکرێت کە لە ڕۆژی 28ـی شوباتی ڕابردوو لە سلێمانی گیراوە، ئەوەش لەدوای سکاڵای پەرلەمانتارێکی یەکێتیی و دڵشاد میرانی، نوێنەری مامۆستایانی ناڕازی.

بەشدار بازیانی و سێ كەس لە هاوكارانی لە دەزگای میدیایی (میدیا21)، لە 28ـی شوبات لەلایەن هێزەكانی ئاسایشى سلێمانی دەستگیركران، دەستبەسەر زۆربەی كۆمپیوتەرو مۆبایلەكانیان گیرا، پاش لێكۆلێنەوە سێ هاوكارەكەی بە ناوی ( دانا ساڵح، نەبەز شێخانی، سەردەشت حەمە ساڵح) ئازادكران، بەڵام جارێكی تر دانا ساڵح، بانگكرایەوە بۆ ئاسایش و دەستبەسەرکرا و دوای لێكۆڵینەوە ئازادکرایەوە.
بەگوێرەی سەنتەری میترۆ، میترۆ لە رۆژی دەستگیركردنیانەوە لە سۆراغی ئەم كەیسە بووە، لە پەرەسەندنەكانی ئاگادارە، هەندێ وردەكاری هەن نامانەوێ لای ئێمەوە بڵاوبكرێنەوە، ئەمە لە چوارچێوەی دەسەڵاتی لایەنی لێكۆڵەرو دادگایە.
سەنتەری میترۆ راشیگەیاندبوو، بەهۆی لیستی تۆمەتەكان، وای بەپێویست دەزانین چاوەڕوانی بڕیاری دادەور بین.

دواجار ئەمڕۆ پێنجشەممە 27ـی ئادار، دوای مانگێک لەدەستگیرکردنی رۆژنامەنووس بەشدار بازیانی ئازادکرا، دوای ئازادکردنیشی لە کۆنگرەیەکی رۆژنامەوانی رایگەیاند، "داوای لێبووردن دەکەین، دەستمان بۆ بابەتی هەستیار برد کە زانیومانە زیانی بە ئاسایشی نیشتمانی گەیاندووە".