توركیا ... قەدەغەکردنی ئەپی چاتبۆتی گرۆك

23:18 2025-07-09 66865 عەرەبی و نێودەوڵەتی 0

2025-07-09

66865

به‌هۆی سوكایه‌تی به‌ رەجەب تەیب ئه‌ردۆگان سه‌رۆك كۆماری توركیا و مسته‌فا كه‌مال ئه‌تاتورك دامه‌زرێنه‌ری كۆماره‌كه، ئه‌مڕۆ چوارشه‌ممه‌ دەسەڵاتدارانی تورکیا ڕایانگه‌یاند، هه‌ندێك ناوه‌ڕۆكی چاتبۆتی گرۆكیان قه‌ده‌غه‌ كردوه‌ كه‌ خاوه‌ندارێتیه‌كه‌ی بۆ كۆمپانیای ئێكسی ئیلۆن مه‌سك ده‌گه‌ڕێته‌وه‌.
‏
‏ئاژانسی ڕۆیته‌رز بڵاویكرده‌وه‌، ده‌سه‌ڵاتدارانی توركیا گرۆكیان قه‌ده‌غه‌كردوه‌، به‌هۆی ئه‌وه‌ی كه‌ ئه‌و ئه‌په‌كه‌ یاساكانی پێشێلكردوه‌ و سوكایه‌تی به‌ دامه‌زراوه‌كانی ده‌وڵه‌ت و هێما و به‌ها ئاینییه‌كان كردوه‌ كه‌ ئه‌م سوكایه‌تیانه‌ له‌ توركیا به‌ تاوان هه‌ژمارده‌كرێن.
‏
‏
‏به‌پێی هه‌واڵی میدیاكان، ئه‌پی چات كه‌ له‌ پلاتفۆرمی ئێكس یه‌كخراوه‌، وه‌ڵامی ناوه‌ڕۆكی هێرشبه‌رانه‌ ده‌داته‌وه‌ كه‌ ئاڕاسته‌ی ئه‌ردۆگان و دامه‌زرێنه‌ری كۆماری توركیا مسته‌فا كه‌مال ئه‌تاتورك ده‌كات، كاتێك هه‌ندێك پرسیاری به‌ زمانی توركی ده‌كرێت.
‏
‏
‏داواكاری گشتی توركیا لێكۆڵینه‌وه‌ی بۆ ئه‌و بابه‌ته‌ كردوه‌ته‌وه‌ و ئاماژه‌ به‌وه‌ ده‌كات كه‌ ئه‌مه‌ یه‌كه‌م قه‌ده‌غه‌كردنی ناوه‌ڕۆكی كه‌ره‌سته‌یه‌كی زیره‌كی ده‌ستكرده‌ له‌ توركیا.
‏
‏ئاژانسی ڕۆیته‌رز بڵاویكرده‌وه‌، ده‌سه‌ڵاتی ته‌كنه‌لۆجیای زانیاری و په‌یوه‌ندییه‌كانی توركیا (BİK) دوای بڕیاری دادگا ڕێگری له‌ چونه‌ ناو ئه‌په‌كه‌ كردوه‌.
‏
‏تا ئێستا نه‌ ئێكس و نه‌ خاوه‌نه‌كه‌ی ئیلۆن مه‌سك هیچ لێدوانێكیان له‌سه‌ر قه‌ده‌غه‌كردنه‌كه‌ نه‌داوه‌.
‏
‏كه‌ناڵی ئێن تی ڤی توركیا له‌ زاری عه‌بدولقادر ئۆرالۆغڵو وه‌زیری گواستنه‌وه‌ و ژێرخانی توركیاوه‌ ڕایگه‌یاندوه‌، توركیا تا ئێستا قه‌ده‌غه‌كردنی ته‌واوه‌تی به‌سه‌ر گرۆكدا نه‌سه‌پاندوه‌، به‌ڵام ئه‌گه‌ر پێویست بكات ئه‌و كاره‌ ده‌كات، ده‌سه‌ڵاتدارانی توركیا له‌گه‌ڵ ئێكس ئه‌و بابه‌ته‌ تاوتوێده‌كه‌ن.
‏
‏یامان ئاكده‌نیر پسپۆڕی یاسای دیجیتاڵی له‌ زانكۆی ئیستانبوڵ، له‌ پۆستێكدا له‌سه‌ر پلاتفۆرمی ئێكس ڕایگه‌یاندوه‌، ده‌سه‌ڵاتداران نزیكه‌ی 50 پۆستیان ده‌ستنیشانكردوه‌ كه‌ له‌لایه‌ن گرۆكه‌وه‌ دروستكراون وه‌ك بنه‌مایه‌ك بۆ لێكۆڵینه‌وه‌ و فه‌رمانی ده‌ستڕاگه‌یشتن به‌ هه‌ندێك ناوه‌ڕۆكیان بلۆككردوه‌ بۆ پاراستنی نه‌زمی گشتی.
‏