بەهۆی بەرزبوونەوەی پلەکانی گەرما چەند پارێزگایەکی عێراق دەوامیان راگرت

22:49 2025-07-26 55811 عێراق 0

2025-07-26

55811

بەهۆی بەرزبوونەوی پلەکانی گەرما هەریەکە لە پارێزگاکانی بەسڕە و میسان و بابل دەوامی فەرمی دامودەزگاکانیان ڕاگرت.
‏
‏پارێزگای میسان، ئەمشەو لە ڕاگەندراوێكدا بڵاویكردەوە، "بڕیاری ڕاگرتنی دەواممان بۆ پاراستنی سەلامەتی فەرمانبەران و هاوڵاتیان داوە، ئەوەش لەبەر ڕۆشنایی ئەو بەرزبونەوەی پلەکانی گەرما کە پارێزگاکە دەگرێتەوە ".
‏
‏لەلایەكی دیكەوە پارێزگاری بەسرەش ڕاگرتنی دەوامی فەرمی ڕاگەیاند و لە ڕاگەیەندراوێكدا دەڵێت، "سبەی یەكشەممە پشوی فەرمیە لە پارێزگاكە بەهۆی بەرزی پلەکانی گەرماوە".
‏
‏لایخۆیەوە پارێزگاری بابل كەمكردنەوەی كاتی دەوامی ڕاگەیاند و عەدنان فەیحانی پارێزگاری بڕیاریدا بە، دەوامی فەرمی بەیانیان لە پارێزگا و بەشەکانی سەر بە پارێزگار لە کاتژمێر 7:00 بەیانی دەستپێبکات و کاتژمێر 1:00 پاشنیوەڕۆ کۆتایی پێبێت".
‏
‏ئاماژەی بەوەشکرد، "شەفتی مەیدانی بەیانیان کە بۆ ئەو فەرمانبەرانەیە کە لە دەرەوەی فەرمانگەکانیان کاردەکەن، لە کاتژمێر 6:00ـی بەیانی تا 10:00ـی بەیانی دەبێت، و ئێوارانیش لە کاتژمێر 10:00ی شەوەوە تا 2:00ـی بەرەبەیانی دەبێت".
‏
‏بەپێی ڕاپۆرتەكانی کەشناسی، ناوچەکانی عێراق بەتایبەتی پارێزگاکانی باشوری وڵاتە، ڕوبەڕوی شەپۆلێکی توندی گەرما بونەتەوە كە پلەکانی گەرما دەگەنە سەرو 50 پلەی سەدی.
‏
‏لەم هەلومەرجەدا حکومەتە خۆجێییەکان لە ژمارەیەك پارێزگا پشوی فەرمی ڕادەگەیەنن بۆ ڕاگرتنی دەوام. ئەوەش بە ئامانجی پاراستنی کارمەندان لە کاریگەرییەکانی بەرکەوتنی ڕاستەوخۆی تیشکی خۆر و پلەی گەرمی بەرز.