بافڵ جەلال تاڵەبانی و وه‌زیری ده‌ره‌وه‌ی فڕه‌نسا کۆبوونەوە

22:51 2025-04-24 86134 كوردستان 0

2025-04-24

86134

بافڵ جەلال تاڵەبانی، سەرۆکی یەکێتی و ژان نوێل بارۆ، وەزیری دەرەوەی فڕەنسا کۆبونەوە و هاوڕابون لەسەر پەلەکردن لە پێکهێنانی حکومەتێکی بەهێز و خزمەتگوزار پێش بەڕێوەچونی هەڵبژاردنی ئەنجومەنی نوێنەرانی عیراق تاوەکو کورد بە یەکگرتویی روبەڕوی ئاڵنگارییەکان ببێتەوە و بەپێگەیەکی بەهێزترەوە لە بەغدا خزمەتی خەڵک و بەرژەوەندییەکان بکات.

به‌گوێره‌ی ڕاگه‌یه‌ندراوێكی نوسینگه‌ی سه‌رۆكی یه‌كێتی، بافڵ جەلال تاڵەبانی لە هەولێر لەگەڵ ژان نوێل بارۆ، وەزیری دەرەوەی فرەنسا کۆبوەوە و لە کۆبونەوەکەدا کە قوباد تاڵەبانی و دەرباز کۆسرەت رەسوڵ، ئەندامانی مەکتەبی سیاسی ئامادەی بون، تاڵه‌بانی جەختی لەبەرەوپێشبردنی پەیوەندی دۆستانەی نێوان هەرێمی کوردستان و فەرەنسا کردەوە.
ئاماژه‌ به‌وه‌شكراوه‌، بافڵ جەلال تاڵەبانی سوپاس و پێزانینی خۆی بۆ پشتیوانی و رۆڵی حکومەت و گەلی فڕەنسا دەربڕی کە لە قۆناغە جیاجیاکانی خەباتدا پشتیوانی گەلی کورد بون و هاوکاریی و پشتگیرییە بەردەوامەکانیانی بۆ هەرێمی کوردستان بەرزنرخاند و رایگەیاند، "ئێمە قەت دۆستەکانمان لەبیرناکەین کە لەگەڵمانن و جێمانناهێڵن".
له‌ ڕاگه‌یه‌ندراوه‌كه‌دا هاتوه‌، لە کۆبونەوەکەدا هەردولا هاوڕابون لەسەر پەلەکردن لە پێکهێنانی حکومەتێکی بەهێز و خزمەتگوزار پێش بەڕێوەچونی هەڵبژاردنی ئەنجومەنی نوێنەرانی عیراق تاوەکو کورد بە یەکگرتویی روبەڕوی ئاڵنگارییەکان ببێتەوە و بەپێگەیەکی بەهێزترەوە لە بەغدا خزمەتی خەڵک و بەرژەوەندییەکان بکات.
ئه‌وه‌ش خراوه‌ته‌ڕو، دۆخی سوریا و رۆژئاوای کوردستان تەوەرێکی دیکەی کۆبونەوەکە بو کە تێیدا جەخت لە پاراستنی مافی تەواوی پێکهاتەکان کرایەوە لە چوارچێوەی سوریایەکی نوێ بە تایبەت کوردانی رۆژئاوای کوردستان.
بافڵ تاڵه‌بانی باسی له‌وه‌شكرد، "یەکگرتویی کورد و پشتگیرییکردن لە مافەکانیان زامنی پاراستنی ئارامی و ئاشتییە لە ناوچەکەدا، هەر بۆیە هانی هەمولایەکمان داوە بە ئاشتییانە و دیالۆگ هەمو ئەو بابەتانەی ناکۆکییان لەسەرە چارەسەربکرێن ئەوەش رێگا دروستەکەیە بۆ گەیشتن بە ئارامی و مسۆگەرکردنی ئاسایش لە رۆژهەڵاتی ناوەڕاست".