سەرچاوەیەک لە ئەنجومەنی نوێنەرانی عێراق ڕۆژی چوارشەممە (29ـی تشرینی دووەمی 2023)، ئاشکرای کرد کە مەیلی تۆمارکردنی سکاڵا هەیە دژی هەندێک لە پارێزگارەکان کە سەرچاوەکانی دەوڵەت بەکاردەهێنن بۆ بانگەشەی هەڵبژاردن.
سەرچاوەکە کە نەیویست ناوی ئاشکرا بکرێت بە ئاژانسی هەواڵی "موتەڵع"ـی ڕاگەیاند کە "ژمارەیەک پارێزگار هەن کە توانا و سەرچاوەکانی دەوڵەتیان بەکارهێناوە لەبەر هۆکاری هەڵبژاردن و پێشێلکردنی ڕێنمایی و بڕیارەکانی سەرۆک وەزیرانی عێراق مەحەممەد شەیاع سودان-یان کردووە بۆ ڕێگەگرتن لە ئەنجامدانی ئەم کارە".
سەرچاوەکە ئاماژەی بەوەشکردووە، "هەندێک لە پارێزگارەکان دۆسیەی دابەشکردنی زەوییان بەکارهێناوە سەرەڕای فەرمانی سودانی بۆ چاوەڕوانی ئەنجامی هەڵبژاردنی ئەنجومەنی پارێزگاکان، هەروەها دۆسیەی خزمەتگوزارییەکان و چەندین بابەتی دیکە کە بۆ بەدەستهێنانی دەنگ بەکارهێنراون".
ئاماژەی بەوەشکرد کە "ئەو پارێزگایانە لیستی هەڵبژاردنیان پێکهێناوە لە پارێزگاکانی خۆیاندا و چاوەڕێی چەندین سکاڵا دەکەن لەلایەن دەستەی چاودێرییەوە کە دەست بە تۆمارکردنی سکاڵا دژی ئەو پارێزگارانە دەکەن".
شایەنی ئاماژەیە، فراکسیۆنە سیاسییەکان ڕەتیان کردەوە ڕەزامەندی لە بڕیارێک بدەن بۆ کشانەوەی دەستی پارێزگاران تا کۆتایی هەڵبژاردنی ئەنجومەنی پارێزگاکان کە بڕیارە لە (18ـی کانونی یەکەمی 2023) بەڕێوەبچێت.
پێشووتر لیژنەی دارایی ئەنجومەنی نوێنەرانی عێراق ڕایگەیاند، کە هۆکاری نەدانی بودجەی تەرخانکراوە بۆ ئەنجومەنی پارێزگاکان ئەوەیە کە بۆ کاری بانگەشەی هەڵبژاردنی داهاتووی ئەنجومەنی پارێزگاکان بەکار نەهێنرێت.