له‌ سەرەتای هێرشه‌كانی سوپای ئیسرائیل بۆ سەر كه‌رتی غه‌ززه‌ كه‌ له‌ 7ی تشرینی یه‌كه‌ی 2023ه‌وه‌ دەستی پێکرد تا ئه‌مڕۆ زیاتر له‌ 32 هه‌زار و 226 فه‌ڵه‌ستینی كوژراون و ده‌یان هه‌زاری دیكه‌ش برینداربون.

وه‌زاره‌تی ته‌ندروستی فه‌ڵه‌ستین له‌ كه‌رتی غه‌ززه‌ له‌ ڕاگه‌یه‌ندراوێكدا، دوایین ئاماری له‌باره‌ی ژماره‌ی قوربانیانی كۆمه‌ڵكوژییه‌كانی ئیسرائیلی له‌ كه‌رتی غه‌ززه‌ بڵاوكرده‌وه‌ كه‌ ماوه‌ی 170 ڕۆژه‌ بۆردومان و شه‌ڕ و پێكدادانه‌كان به‌رده‌وامن. 
به‌گوێره‌ی ڕاگه‌یاندراوه‌كه‌، له‌ماوه‌ی 24 كاتژمێری رابردودا ھێزه‌كانی سوپای ئیسرائیل، ھه‌شت كۆمه‌ڵكوژی دیكه‌یان دژی فه‌ڵه‌ستینییه‌كان له‌ كه‌رتی غه‌ززه‌ ئه‌نجامداوه‌ و له‌ ئاكامدا، 84 كه‌س كوژراون و 106 كه‌سی دیكه‌ش برینداربوون.

ئه‌وه‌شیخستۆته‌ڕو، ژماره‌ی ئه‌و فه‌ڵه‌ستینییانه‌ی كه‌ تا ئێستا له‌ ئه‌نجامی كۆمه‌ڵكوژییه‌كانی ئیسرائیلدا له‌ غه‌ززه‌ كوژراون، به‌رزبووه‌ته‌وه‌ بۆ 32 ھه‌زار و 226 كه‌س، هه‌روه‌ها 74 ھه‌زار و 518 كه‌سی دیكه‌ش بریندارن.