بەشداربووان لە کۆبوونەوەی یەکێتیی نیشتمانی هۆز و ناوەندە سووریاییەکان، داوایان لە حکومەتی سوریا کرد کە گفتوگۆی ڕاستی لەگەڵ بەڕێوەبەرایەتی خۆسەری ڕۆژئاوای کوردستان دەست پێبکەن.
دووهەمین کۆبوونەوەی یەکێتی نیشتمانی هۆز و ناوەندە سووریاییەکان بە بەشداری ژەنەراڵ مەزڵوم عەبدی فەرماندەی گشتی هێزەکانی سوریای دیموکرات و سەرۆک هۆزەکان و ناوەندەکانی باکوور و ڕۆژهەڵاتی سووریا و ڕۆژئاوای کوردستان لە ستادیۆمی وەرزشی حەسەکە بەڕێوەچوو.
لە دیدارەکەدا کە بە بەشداری پێنج هەزار کەسایەتی بەڕێوەچوو، مەزڵوم عەبدی گووتی: "ئامادەی ڕووبەڕووبونەوەی هەر هێرشێکی دەرەکی بۆ سەر خاکەکەمانین".
لە بەرامبەردا و لەلایەکی تری دیدارەکە، سەرۆکی هۆزە عەرەبییەکانی سوریا داوای ئاسایکردنەوە و پتەوکردنی پەیوەندییەکانی بەڕێوبەرایەتی خۆسەری ڕۆژئاوای کوردستان و حکومەتی سووریا کرد.