مەسرور بارزانی: حکومەتی هەرێم ڕێگە بەهیچ لایەنێک نادات خاکی هەرێم دژ بە ئێران بەکاربێنێت
مەسرور بارزانی، سەرۆکی حکومەتی (ماوە بۆ درێژکراو)ی هەرێمی کوردستان دەڵێت: پێشوازیم لە بەڕێز عەلی باقری، سەرپەرشتیاری وەزارەتی دەرەوەی کۆماری ئیسلاميی ئێران کرد، پەرەپێدانی پەیوهندییەکانی نێوان هەرێمی کوردستان و کۆماری ئیسلامی ئێرانمان تاووتوێ کرد و هاوڕابووین لەسەر برەودان بە پەیوەندیی دوولایەنە لەسەر بنەمای ڕێز و بەرژوەنديی هاوبەش.
لە کاتێکدا سەرۆکی حکومەتی هەرێم بە زمانی ئینگلیزی لە تۆڕی کۆمەڵایەتی ئێکس نوسیویەتی، "حکومەتی هەرێمی کوردستان ڕێگە بەهیچ لایەنێک نادات کە خاکی هەرێمی کوردستان وەک هەڕەشە و دژ بە ئەوان (ئێران) بەکاربهێنێت".
بەیانی ئەمڕۆ هەینی، عەلی باقری وەزیری دەرەوەی ئێران بەوەکالەت گەیشتە هەولێر و بڕیارە دواتر دەگاتە سلێمانی و لەگەڵ بافڵ تاڵەبانی، سەرۆکی یەکێتیی نیشتمانیی کوردستان کۆدەبێتەوە.
بەیانی دوێنێ چوارشەممە (13ـی حوزەیرانی 2024)، عەلی باقری وەزیری دەرەوەی ئێران بەوەکالەت بەسەردانێکی فەرمی گەیشتە بەغداو لەگەڵ بەرپرسانی باڵای عێراق پرسی پەیوەندییەکانی نێوان هەردوو وڵات تاوتوێ کرد و یەکێک لە تەوەرە سەرەکییەکان باسی رێککەوتنی ئەمنی نێوان عێراق و ئێران بوو سەبارەت بە چەک داماڵین و رێگریکردن لە چاڵاکییەکانی حزبەکانی رۆژهەڵاتی کوردستان.